Lanserer nasjonalt EU-nettverk for å styrkje norske energi- og havnæringar
Fleire norske EU-prosjekt er målet når sterke innovasjonsmiljø langs vestlandskysten samlar krefter.
(Bak f.v.) Håvard Tvedte (Maritime CleanTech), Kristoffer Hammer (Vestland fylke), Lene Kristin Hansen (NORCE), Kyrre Aas (Universitetet i Stavanger), Kristoffer Moldeklev (Energy Transition), Edel Bertine Dirdal (Innovasjon Norge). (Framme f.v.) Helene Tråsavik (Rogaland fylke), Kjersti Skjervheim (Høgskulen på Vestlandet), Jane Junger og Charlotte Gannefors Krafft (begge Universitetet i Bergen).
Med støtte frå Forskingsrådet og Innovasjon Noreg, skal CleanFlow Energy-nettverket mobilisere fleire norske aktørar til Horisont Europa, særleg i utlysingar som fokuserer på klima, energi og mobilitet.
– Dette initiativet er avgjerande for å byggje tverrsektorielt samarbeid som kan akselerere overgangen til eit lågutsleppssamfunn, seier Kyrre Aas, prosjektleiar ved Universitetet i Stavanger.
Prosjektet skal koordinerast frå Stavanger, men samlar eit kraftfullt nettverk av partnarar frå Vestlandet:
Maritime CleanTech, Norwegian Offshore Wind, Energy Transition Norway, GCE Ocean Technology, NORCE, Høgskulen på Vestlandet, Universitetet i Bergen, samt fylkeskommunane i Rogaland og Vestland.
Sjølv om nettverket har røter i vest, har CleanFlow Energy-nettverket eit nasjonalt mandat.
Lanseringa var på Norway House i Brussel under første dag av EU Sustainable Energy Week, og det synleggjer korleis norsk forskings- og industriell kompetanse er aktive drivarar i det grøne skiftet i Europa.
- Gjennom slike samarbeid bygger me bruer. Norske industri- og forskingspartnarar deltar aktivt i EU-samarbeid for å få til innovasjon og grøn omstilling. Dette nye nettverket forsterkar denne innsatsen på tvers av grensene, seier Håvard Tvedte, direktør for marknadsutvikling i Maritime CleanTech.
“Gjennom slike samarbeid bygger me bruer.”
CleanFlow Energy-nettverket vil arrangere møteplassar for samarbeid, tilby målretta støtte til søkjarar og bidra strategisk til framtidige EU-utlysingar. Gjennom internasjonalt nettverksarbeid er målet å auke Noregs fotavtrykk i Horisont Europa-prosjekt fram mot 2027.
Neste offisielle arrangement blir i starten av september, under den nasjonale Maritim Uke i Haugesund, ein viktig arena for industri, forsking og tverrsektorielt samarbeid.
Håvard Tvedte i Maritime CleanTech fortel om dei mange pågåande EU-samarbeida om grøn skipsfart under lanseringa av CleanEnergy Flow-nettverket i Brussel.
(Tekst og foto frå pressemelding.)