Bømlakonferansen fulltegna

Den årlege Bømlakonferansen i regi av Bømlo Næringsråd hadde rekorddeltaking då den gjekk av stabelen i Bømlo Kulturhus nyleg. Inkludering var eit av stikkorda for konferansen.

Lauritz Eidesvik er styreleiar i Bømlo Næringsråd. Ragnfrid Sønstabø er dagleg leiar.

- Me har samle 186 deltakare, 120 frå næringslivet og 66 Vg3 elevar frå Bømlo vidaregåande skule, sa Ragnfrid Sønstabø som leiar næringsrådet.

Elevdeltakinga handlar om inkludering. I det heile var nettopp inkludering eit gjennomgåande tema på konferansen. Adm. dir. Pablo Barrera var innom dette i sitt innlegg.

- I Haugaland Kraft har me ei målsetjing om 25 prosent kvinner og 10 prosent i opplæringsstillingar, sa mellom anna han.

Den norgeskjente “helsesista”, Tale Maria Krohn Engvik”, nytta heile sitt innlegg til omsorg og inkludering.

- Bømlo er gode på inkludering, sa rektor Tor Inge Kalstad på Bømlo vidaregåande skule.

“Bømlo er gode på inkludering.”

— Tor Inge Kalstad

Han viste særskilt til alle verksemdene som bidreg til motiverte elevar ved å ta dei imot i utplassering og anna.

Om temaet fusjonsenergi eigentleg kan seiast å ha noko med inkludering å gjere, er kanskje tvilsamt, men fysikkprofessor Geir Ersland, opphaveleg frå Bømlo, fortalde i alle fall levande om krafta som kan utløysast ved samansmelting, altså fusjon av atomar.

Overordna tema for Bømlakonferansen var “kraft i krisa”, og det var nær slik at heile forsamlinga kom til å tru at fusjonsenergi kan løyse heile energi- og klimakrisen.

- Eg er optimist for framtida, sa i alle fall Ersland.

Geir Ersland er professor i fysikk ved Universitetet i Bergen.

(Tekst og foto SMe)